قصر الكبابجى: إحنا مش البزنس مان الشرير اللي بيصحى من النوم يفكر هيأذى مين
كتبت/سعاد حسن
تصدرت محلات صبحى كابر حديث مواقع التواصل الاجتماعي فى الـ 24 ساعة الماضية ،بعد أن أعلن مالكها صبحى كابر بيعها لأحد المحلات الشهيرة بسبب تعثره ماديا
اتجهت الأنظار إلى محلات قصر الكبابجى مؤكدين أن مالك محلات قصر الكبابجى هو المالك الجديد لمحلات صبحى كابر
وفى أول رد فعل أصدرت الصفحة الرسمية لمحلات قصر الكبابجى بيان رسمى ترد فيه على الإتهامات الموجهة لها جاء فيه:
مساء الخير
طبعا كلنا مصدومين للي حصل ل علم كبير جدا من اعلام الشغلانه و يمكن واحد من أهم رواد المطبخ المصري حديثا و هو الغني عن التعريف المعلم صبحي كابر
بدون الدخول في تفاصيل كتير لان المعلم صبحي طلع و قال كل حاجه بنفسه و لكن البعض يريد بشكل أو بآخر يحط اسم قصر الكبابجي في جملة مفيدة لأغراض لا يعلمها الا الله عشان نكون سبب ضرر أو أذى لاي شخص كان و يشهد الله أننا عمرنا ما عملنا ولا هنعمل ده
ف لا يا جماعه ، مش احنا المطعم الشهير اللي يقصده المعلم صبحي ، بكل صراحه و وضوح و بدون تحوير ، لا ، مش احنا ، احنا بعيد جدا عن الموضوع ده و يمكن احنا المكان الوحيد اللي دعمنا منافسينا مرة و اتنين و تلاته هنا على الصفحة و اللي متابعنا عارف كويس ف ليه طيب نلاقي ردود الأفعال عكسيه؟!
ع العموم مفيش اي هدف من البوست ده غير دعم المعلم صبحي كبيرنا و اللي سبقنا في المجال بكتير و محاوله لإخماد نار اشاعه ملهاش لازمه هتحطنا في مكان البزنس مان الشرير بتاع المسلسلات اللي بيصحى الصبح يشرب سيجار كبير و هو لابس الروب على البدلة و يشوف هيأذي كام واحد انهارده ، كفاية دراما ارجوكم
