شاهد عيان على حادث مشجعتين النادي الأهلي يروي تفاصيل مؤلمة

كتبت/سعاد حسن 

ما زال حادث مصرع نورهان ونرجس مشجعتين النادي الأهلي يسبب حالة كبيرة من الحزن على مواقع التواصل الإجتماعي 

ومنذ قليل علق أحد مشجعي النادي الأهلي الذي كان يستقل أتوبيس مشجعي النادي الأهلي مع نورهان ونرجس على الحادث واتهم فيه مشرفين الترحال بالنادي بالتقصير في إنقاذ الفتايتين وعلق قائلا 

اللهم إنا نعوذ بك من فواجع الأقدار .. ومن فقد الأهل ومن حزن القلب وحرقة الشعور .. اللهم لا تفجعنا بمن نحب، 
وأحسن خاتمتنا و أجرنا من موت الغفلة .. ولا تأخذنا من الدنيا إلا وأنت راضٍ عنا يارب العالمين.

ربنا يرحم نور ونرجس ادعولهم محدش ف ايده حاجه يجماعه غير الدعاء ليهم بالرحمة والمغفرة لان دا قدرهم ومكتوب ربنا يصبر اهاليهم ويربط ع قلوبهم.

حابب بس اتكلم ف حاجه البنتين دول كانو طالعين مع اتوبيسات النادي اللي النادي الأهلي مشكوره مطلعها لجمهوره من القاهره ل الاسكندريه انا مش بزايد ع حد ولا بفتري ع حد والناس اللي حضرت الموقف وشافته بعنيها هتعرف اني مش بغيب حد ولا بكذب ف كلمه البنتين دول طلعو الاتوبيس بعد الماتش ونزلو منه يجيبو اكل من السوبر ماركت اللي ف الناحيه التانيه من الطريق والناس اللي ف الاتوبيس كلها تشهد ع كده وف ناس اتخانقت مع المشرف بسبب انه واقف مستنيهم وقالوله بالنص انت هتوقف الاتوبيس دا كله علشان بنتين نزلو السوبر ماركت حصل اللي حصل والبنتين وهما بيعدو الشارع عربيه خبطتهم قضاء الله وقدره انت ازاي ك مشرف ترحال ومعاك منظم ومعاك ناس مسؤله من النادي الأهلي تشوف بعينك بنتين جايين معاك من القاهره طول الطريق وتبقى بتتعامل عادي وانت شايفهم سايحين ف دمهم ع الارض وللامانه علشان ندي لكل واحد حقه من الاتوبيس كله منزلش غير اتنين رجاله منه اللي انت ي مشرف كنت بتحاول تركبهم تاني بحجه انك هتطلع ب الاتوبيس ورا الإسعاف ع المستشفى والعيال قالولك لا وراحو هما المستشفي انا معرفش اسمائهم علشان امنشنلهم بس هما لما يقرأو كلامي هيعرفوني لاني قابلتهم ف المستشفى ودم اخواتهم ع اديهم ناشف والله ما غسلوه واحد منهم كلم صاحبه بعد ما وصل المستشفى اللي ف الاتوبيس اللي المفروض مات منه بنتين المفروض امانه ف رقبتك والمفروض تقف حتى تشوف هما فيهم النفس ولا خلصو وماتو لما الراجل اللي نزل من الاتوبيس يرن ع صاحبه اللي ف الاتوبيس يقوله مش المشرف قال انتو جاين ع المستشفي صاحبه قاله دا احنا داخلين ع كارته القاهره يعني انت كنت عاوز تركب الناس اللي نزلت من الاتوبيس علشان ترجع ناقص اتنين بس مش اربعه للدرجادي حياه اتنين من الجمهور اللي طالعين معاك من القاهره مش فارقه وماشي وسايبهم ورا ظهرك ولا كانهم كانو معاك ف الترحال طب لو هيا ماشيه كدا لي بقا النادي بيطلع مشرفين ومنظمين!؟.
ما كانو سابوها عايمه بقا واللي يركب يركب واللي ينزل ينزل واللي يموت يموت طلاما المشرف اللي موجود مش امين ع أرواح الناس اللي معاه ولا فارقة حد يجراله حاجه منهم ولا لا دا انا لو رايح موصلات واتخبطت وانا نازل من العربيه السواق هيفتح بابه ينزل يطمن عليا ويطلبلي الإسعاف مع اني مش مسؤل منه زي ما البنات دي كانت مسؤله منكو المفروض لما كنت اروح المستشفي الاقي حد من النادي او مشرفين النادي بس محصلش روحت لقيت الراجلين اللي نزلو من الترحال شالوهم وواحد أو اتنين كانو طالعين موصلات وشاف الحادثه ف جريو ع المستشفى يطمنو ع البنتين اللي اول مره يشوفوهم مش جاين معاهم سكه سفر ولا طالعين ف أتوبيس واحد طول الطريق.

لو لاعب ولا حكم اتعور ف صباعه الدنيا ممكن تتقلب وتقوم متقعدش واظن ان جمهور النادي زيه زي اللاعيبه ويمكن اهم كمان الاعيبه دا شغلها واكل عيشها إنما الجمهور لا ف من حق الجمهور ع النادي انه يتعامل ك بني ادمين علشان دي ابسط حقوقهم اسف اني طولت عليكو بس انا محروق دمى من اللي حصل وكنت لازم احكيه.