رنا سماحة تتوعد طليقها وتكشف عن موقف صادم له (فيديو
كشفت المطربة رنا سماحة، أسباب إنفصالها عن زوجها الملحن سامر أبو طالب لأول مرة، بعد زواج استمر 5 سنوات، ورفعها قضية خلع مؤخرًا
وقالت رنا سماحة خلال لقائها مع برنامج "أوضة ضلمة" الذي تقدمه الإعلامية إنجي هشام على شاشة "هي": انفصلنا لما كنت حامل ورجعنا حطينا شروط عشان مكناش حاطين لحياتنا شروط قبل كده,, كل واحد فينا مختلف وكان عايش بطريقة مختلفة ومش عايز الطرف التاني يأثر أو يسيطر عليه أو يغير فيه حاجة لما حطينا الشروط عشان نكمل ده محصلش".
واستكملت رنا حديثها: مش شروط على قد ما هي أساسيات.. زي الخصوصية بتاعت البيت لازم تكون بين الزوج والزوجة مش بس فكرة جوازي، لكن أحس أني ست وعايزة الطرف التاني يكون سندي وضهري، كنت حاسه اني لوحدي وبشيل مسؤولية نفسي، أحيانا كان بيساعدني، أنا وسامر اتجوزنا بسرعة رهيبة مكنش في بينا قصة حب كبيرة، مهما كان صاحبي قفلة البيت حاجة تاني على الشخصين".
وتابعت رنا سماحة لـ "أوضة ضلمة"، قائلة: تاني مرة قررت مش هرجع والحياة وقفت هنا مش هكمل يوم واحد تاني مكنش راضي يطلقني كان عنده نفس إحساسي انه عايز يطلق ومحاولش يتمسك بيا". -
وتحدثت رنا سماحة عن سبب رفعها قضية خلع على طليقها: معرفش ليه مكنش ليه عايز يطلق وديًا- جايز مكنش عايز يديني حقوقي، قعدت شهور في بيت اهلي مبيصرفش عليا ولا على ابنه، وبشتغل وربنا يكرمني وطول عمري شخصية مسؤولة- أنا تنازلت عن كل اللي يخصني ك رنا لكن ابني لأ"،
كما تحدثت عن علاقتها بأهل طليقها قائلة: اهله محدش يعرف عني حاجة من بعد الانفصال- كانوا بيشوفوا حفيدهم لما بقوله تعالى خد مالك ، رفع قضية رؤية وهو بيشوف الولد وهو قاعد عنده في البيت، معرفش مين مصلحته يعمل كده لكن بيقووه ، على الغلط، ولو حاول يرجع مستحيل أرجعله.
كما كشفت المطربة رنا سماحة عن مواصفات فتى أحلامها، كما تحدثت عن المواقف التي شعرت فيها بالظلم في حياتها.
وقالت رنا سماحة خلال لقائها ببرنامج "أوضة ضلمة" التي تقدمه الإعلامية إنجي هشام على شاشة "هي"،: هقول زي ما كنت بقول قبل جوازي عايزه حد أرجل مني مش لمجرد المسؤولية، وفكرة أنه يصرف على زوجته مع ان ده من حقوقي ك ست تصرف عليا- ودي ظاهرة طالعه ان الرجالة مش عايزه تصرف على ستاتهم - المفروض متكنش محتاجة تصرف عليها انت تعرف ده لوحدك.
وتحدثت رنا سماحة عن فترة عملتا كمذيعة والظلم التي تعرضت له، قائلة: حسيت بالصدمة كنت بشتغل في مكان من الأماكن اللي قعدت فيها فترة كبيرة.. ف حصل حاجة جوه ومشيت بطريقة مستحقهاش، وزميلي كمل لأن مكنش عنده خلافات لكن انا كان عندي، والناس اللي بتستغرب أني ازاي مذيعة وأنا مطربة، هو في حد يشتغل مذيعة لمدة 10 سنين زيي ؟".
وقالت رنا سماحة: مبندمش على اي حاجة في حياتي- حتى لو اتوجعت فيها -كل حاجة عشتها استفدت بيها، ولما أجهضت قبل كده ده رزق ونصيب وتجربة مؤلمة جدا نفسيا وجسديا.. ده رزق زيه زي اي حاجة في حياتي.
برنامج "أوضة ضلمة"، تقدمه الإعلامية إنجي هشام على شاشة قناة "هي" يوميًا خلال شهر رمضان من السبت إلى الخميس، في تمام الثامنة مساءً وتستضيف خلاله عددًا من نجوم الفن والرياضة الذين يتحدثون عن نجاحاتهم ومسيرتهم المميزة.
