رسالة مؤثرة من عصام صاصا إلي متابعيه عبر صفحته الشخصية

كتبت/سعاد حسن 

أعلن مطرب المهرجانات عصام صاصا عن تأثره الشديد منذ أن تسبب في حادث دهس أحد الأشخاص على الطريق الدائري مما أدى إلى وفاته

وكتب عبر صفحته الشخصية بموقع التواصل الإجتماعي فيس بوك:

ربنا وحده يعلم انا بكتب الكلام دا وانا عامل ازاى و فيا ايه .. 

انا بقالي اكتر من شهر قاعد من غير شغل ومعنديش اي حاجه اعملها غير اني قاعد وما باليد حيله و مستني قضاء ربنا سبحانه وتعالي و محدش هيفهم او هيحس بالموضوع غيرى .. 

و انا مطلعتش اتكلمت وعدت وزدت في الموضوع كتير ومحدش شافني حته بفيديو قولت اي كلمة خالص 
لكن انا عندي شغلي و عندي عقود والتزامات لما اعملها واخلصها يا اما هدخل في قصه تانيه انا مش قدها و شرط جزائي .. 
انا هنزل شغلي و هشتغل لاني مش ب ايدي اي حاجه غير اني اعمل كده 

انا عندي امي و عندي اخويا و عندي مراتي وابني وفرقه فيها اكتر من ٣٥ شخص في رقبتي انا شاب لسه ببداء حياتي ولسه بقول يارب .. مصاريف البيت و الاقساط و الحاجات دي كلها اللي انتو متعرفوش عنها حاجه مين اللي هيدفعها انا طالع اتكلم لان ما باليد حيله غير انكم لازم تفهموا ان كل اللي بتسمعوا مش صح الفلوس و القصور والعربيات كل ده مش صح و حال الناس اللي شاغلين معايا كل دول حالهم واقف بسببي انا كل دول ليهم بيوت وعيال ودنيا تانيه خالص 

انا عارف ومتاكد ان ربنا مش هيورينا الشر و مش هيوريني اي حاجه وحشه ده ابتلاء من عند ربنا سبحانه وتعالي و انا راضي ب كل حاجه و مش هقول غير الحمدلله علي كل شئ والحمدلله و اللي ربنا كاتبهولي هشوفوا .. سوا خير او شر محتاج من كل الناس اللي بتحبني تدعيلي من قلبها بجد انا عمري ما كنت شخص مؤذي و عمري ما كنت شخص وحش مع حد .. ربنا كبير ..