بسنت صيام تؤدى مناسك العمرة عن الفنانة سعاد حسني

كتبت/سعاد حسن 

أعلنت الفنانة بسنت صيام ابنة الفنان أحمد صيام عن قيامها بأداء مناسك العمرة عن الفنانة سعاد حسن 

وكتبت عبر صفحتها الشخصية الرسمية بموقع تبادل الصور والفيديوهات إنستجرام:

وعدت ووفيت يا ست سعاد.. الحمد لله وربنا يتقبل
العمرة التانية اللي عملتها كانت لسعاد حسني
وعد كنت وعدته من وأنا صغيرة أن أول ما ربنا يكتبلي عمرة هعملها واحدة
حبي ليها مش حب عادي اللي يعرفني عارف أن بيتي كله صورها عندي لبس وشنط وحاجات كتير عليها صورها.. أنا حبيت الفن منها وأنا صغيرة كنت عايزة أمثل عشان أمثل أفلامها بس مش هو ده الحب أنا بحبها اللي هو دايماً بترحم عليها وأدعيلها وأقرالها قرآن وطول عمري شايفة إني معنديش هدية أكبر ولا أحلى من العمرة أهديها بيها والحاجة الوحيدة اللي ممكن تكون هي محتاجاها وكمان هي معندهاش أولاد وللأسف على قد ما الناس كلها بتحبها الناس مبتفتكرش تترحم ولا تدعي للفنانين معرفش ليه

أنا مكنتش ناوية أتكلم في الموضوع ده عشان دي حاجة بيني وبينها وبين ربنا بس بقالي شوية بضايق وبستغرب أوى إزاي الناس تكون بتحب فنان أو فنانة أوي ويجروا عشان يتصوروا معاهم وفي نفس الوقت يقطعوا فيهم ويشتموهم ويستحلوا الكلام في عرضهم كده… بجد حاجة مخى مش فاهمها
وكله كوم بقى ولما يبقى الكلام ده على حد أتوفى والفكرة أن دايماً الناس دي بتتكلم بالدين طب ده حتى الدين بيقول أذكروا محاسن موتاكم

نفسي تاخدوها حاجة كدة وإنتوا بتتفرجوا على التليفزيون ولقيتوا ممثل بتحبوه وتوفى خدوا عشر ثواني اقروله الفاتحة ولو يا سيدي شايف أن اللي بيعمله حرام قول لنفسك كده معناه أنه محتاج الدعوة أكتر

ربنا يرحمك يا زوزو ويتقبل مني ويجعلها في ميزان حسناتك يا رب