الدكتور محمد الناظر: ربنا ذكر البلوجلر والـ influencers في القرآن وحذرنا منهم
كتبت/سعاد حسن
قال الدكتور محمد الناظر نجل الدكتور الراحل هانى الناظر أن الله سبحانه وتعالى ذكر البلوجلرز والـ influencers في القرآن الكريم وحذرنا منهم في كتابه الكريم
وكتب عبر صفحته الشخصية الرسمية بموقع التواصل الإجتماعي فيس بوك
معلومة خطيرة بجد:
هل تعلم ان ربنا ذكر صانعي المحتوى والمؤثرين (influencers) في القرآن وحذر الناس من اتباعهم تحذير شديد... ومش بس كده، هو كمان وصف اللي بيعملوه بالضبط..
زمان كان صانعي المحتوى واللي لهم متابعين هم الشعراء، وكل ما الشاعر كان قوي كل ما كان شعره بيوصل لعدد اكبر ويبقى عنده followers..
وكان الشعراء دول بيستغلوا الشعر ده عشان يتربحوا منه بشكل مباشر او غير مباشر، والجامدين منهم كان عندهم ممولين (sponsers) بيدوهم فلوس عشان يسوقوا لهم أو ينشروا معلومات لمصلحتهم...
يعني باختصار زي اللي بيعمله اغلب صانعي المحتوى حاليا والمؤثرين..
سورة كاملة ٢٢٧ آية، والملفت في السورة دي ان آياتها كلها قصيرة جدا وسريعة وكتير جدا، مش زي اي سورة تانية (وطبعا ربنا له حكمة، لو حد يركز ويفهم العلاقة)
في اخر السورة ربنا وصف صانعي المحتوى ده وقال:
”والشعراء يتبعهم الغاوون، ألم تر أنهم في كل واد يهيمون، وأنهم يقولون ما لا يفعلون، إلا الذين آمنوا وعملوا الصالحات وذكروا الله كثيراوانتصروا من بعد ما ظلموا”
يعني:
اللي يسمع كلام صانعي المحتوى والمؤثرين هيروح في داهية.
ليه؟
انت مش شايف انهم بيتكلموا في أي سبوبة
وبيقولو كلام هم مش بيعملوه، يعني مثلا يسوق لك منتج هو اصلا مش بيستعمله..
هل كلهم كده؟ لا
في قليلين منهم جدا محترمين وبيراعوا ربنا وفاكرينه دايما
والناس دي لأنها بتعمل كده ومش بتمشي ورا الترند وبتحاربه وتحذر منه، هتتحارب وتتظلم...
اللي عاوز أقوله لكم، ماحدش يصدق اي واحد بيكتب حاجة او يعمل فيديو لمجرد ان كلامه حلو، حتى لو كان الشخص ده أنا...
ابذل مجهود واتأكد من المعلومة وماتصدقش الا الشخص اللي عنده مبادئ وبيخاف ربنا..
الموضوع صعب طبعا لأن كتير منهم بيدعي انه بيخاف ربنا عشان يكسب ثقة الناس، عشان كده مافيش حاجة اسمها اتباع أعمى لأي شخص في الدنيا...
انا بشوف في مجالنا كوارث أقسم بالله، والناس يا حرام بتصدق وتجري تشتري وتعمل وتدفع...
ربنا يسترها علينا وعليكم كلكم..
