الداعية مصطفي حسني يكشف عن أسرار حياته الأسرية لأول مرة
كتبت/سعاد حسن
حل الداعية مصطفى حسني ضيفاً على الإعلامية مني الشاذلي أمس الخميس في برنامجها "معكم"
وتحدث مصطفي حسني لأول مرة عن زوجته وأسرته قائلاً
- في مرات قليلة نشرت صورة زوجتك وأولادك .. ربنا يخليهملك
= الصور دي قديمة .. هنا بنتي دلوقتي عندها 17 سنة .. دي أمل أسعد مراتي الجوهرة اللي ربنا ساترني بيها
- السيدة أمل أسعد بتغير على مصطفى حسني وهو متأنق وعندك معجبات ؟
= من صدق نجا زي ما النبي قال أمل إنسانة ربنا سترني بيها ومرت معايا بمراحل كتير ، الشهرة في الأول بيبقى فيها استغراب من مهاجة البعض اللي مش عاجبه كلامك ومن إقبال المحبين الصادقين .. مرت معايا أمل بالمرحلتين دول وبالجزء الأnـثوي
كان فيه استغراب منها إن حد يوقفني ويقولي بحبك ، هو محدش بيحبني الناس بتحب الكلام مرورًا بالكرام اللي بييجوا يتصوروا معايا في وجود أمل مراتي وصولًا لفهمها إن الناس اللي بتيجي تسلم علينا في مطعم أو شارع أو أيًا كان دي ناس تواضعت جدًا ، الإنسان اللي يسيب أكله وييجي يقولي كلمتين يجبر بخاطري ده كدة عملي قيمة كبيرة
البني آدم عشان يروح يقول لحد أنا بحبك أو انت أثرت فيا ده حد فكر وركز قبل ما ياخد الخطوة ، وبعدين هو مايعرفنيش ممكن أكون أنا غليظ أو زهقان أو غضوب فـ أقوله كلمة تكسفه فـ كون إنه شال كل الحواجز دي حاجة كبيرة إن حد ييجي يعمل معايا كدة
أنا اتعلمت حاجة في المسألة دي والناس اللي علمتهالي .. فيه حد بييجي يسلّم عليا أنا معرفوش بس هو يعرفني كويس أوي ، يقولي مثلا أنا كنت حزين وسمعتلك فيديو طلعني من مشكلتي ، أنا ماكنتش بصلّي وانت اتكلمت عن الصلاة فـ أنا بدأت أصلّي
فـ هو بيتكلم كأنه عارفني وجاي يسلّم عليا بتاريخ وأنا أول مرة أشوفه/أشوفها .. لو أنا ماخدتش بالي إن لما آخد 100 كيلو حب ورحمة وإقبال لازم أردهم .. ربنا أمر " فحيّوا بأحسن منها " أو عالأقل ردها .. لأن البني آدم كتلة لحم ومشاعر وكتلة توقعات
فـ أمل مراتي إنسانة رزينة وحكيمة جدًا ، وعاشت معايا المعلومات دي وفهمتها فـ عمرها ما كانت عبء عليا
