محمد الناظر: النهاردة ذكري يوم كان أكثر آمالي فيه إني ادخل الحمام

كتبت/سعاد حسن 

منذ وفاة الدكتور هاني الناظر ،حرص الجميع من محبيه على متابعة نجله الدكتور محمد الناظر الذي ذكر في أكثر من تصريح له أنه سيسير على نهج والده في مساعدة الناس بالاستشارة الطبية مجانية 

ومنذ قليل تفاعل متابعيه مع بوست نشره الدكتور محمد الناظر عبر صفحته الشخصية الرسمية بموقع التواصل الإجتماعي فيس بوك جاء فيه 

ده مش بوست للصعبانيات، لكن فعلا محتاجين نتعلم ونركز

النهاردة الذكرى التانية ليوم من أصعب أيام حياتي وأكثرها ألما وعذاب بدني، لما عملت تغيير مفصل الورك اليمين..

كنت باخد مسكنات في منتهى القوة (مخدرات حرفيا) ومتألم جدا، ماقدرش اتحرك او حتى اتقلب ولا انام..

وفضلت فترة مش قليلة اقصى امالي اني اعرف ادخل الحمام...

الحمد لله انا دلوقتي، بعرف أمشي وبعرف انام، ولما بتقع مني حاجة في الأرض بعرف اجيبها، وبعرف ادخل الحمام عادي كده بسهولة، وبعرف ارفع رجلي من على السرير وأنزلها.. بعرف استحمى وبعرف اقوم أقف لما بكون قاعد... 

شفت انا عديت لك كااام حاجة، انت اصلا مابتحسبهمش نعم وانت غرقان فيهم لأنك مش عارف قيمتهم...

انا نفسي اللي كنت زي النهاردة بتمنى اعرف اعملهم، كام مرة بشكر ربنا على النعم دي..

عمرنا ما هنقدر نوفي ربنا حقه في شكر نعمته، بس اللي نقدر نعمله، اننا نعيش يومنا كله عارفين ان فيه ملايين النعم مغرقانا ولازم نشكرها بقدر المستطاع..