خبير تربوي: الامتحانات والتعليم مسرحية كبيرة وكلنا ممثلين فيها

كتب/أحمد رمضان

وصف الخبير التربوي والمعلم الخبير الدكتور  محمد زهران  امتحانات الشهر بالمسرحية،واكد أنها ليس لها أي قيمة وإهدار للوقت ليس إلا

وكتب عبر صفحته الشخصية الرسمية بموقع التواصل الإجتماعي فيس بوك 

امتحانات إيه يا ابو امتحانات ؟ !!
شهر ونص ضايع أونطة من التيرم الأول في الامتحانات الشهرية !!
اقسم بالله الامتحانات دي كلها ولا ليها لازمة هي عبارة عن مسرحية أو سميها فيلم هندي و كل واحد بيمثل دور ف الفيلم ، الوزارة بتمثل انها بتعلم التلاميذ و بتمتحنهم و العيال بيمثلوا انهم بيمتحنوا و المدرسين بيمثلوا انهم بيراقبوا و يصححوا و ولي الامر بيمثل انه بيكافح عشان تعليم ولاده و هو اصلا مش بيودي ولاده المدرسة ، و أدينا بنستهبل على بعض ، و المحصلة ان كلنا اتوكسنا و مفيش تعليم و لا حتى بقى فيه تربية ؟ !! .
يعني سيادتك عندك عجزصارخ في المعلمين والعمال والإداريين والموجهين والمتابعين ؛ ومش عارف تعين 30 ألف معلم بحجة انهم تخان وحوامل وبيرضَّعوا ؛ ومش عارف تعمل عقود للي بالحصة ، وحتى الكتب جزء كبير منها لم يتم طبعه ؛ ومقرر شهر أكتوبر لم تنتهي منه حتى الآن ؛ وما عندكش خامات امتحانات ؛ ولا ميزانية للتصوير !! ؛ كان من باب أولى توفر الشهر ونص دول للانتهاء من المقررات الدراسية سواء بالمدارس أو في الدروس الخصوصية
؛ لاشك إن الامتحانات الشهرية عبء على الجميع .
دكتور محمد زهران ..