تفاصيل إحالة مسؤولة بتعليم الإسكندرية للتحقيق أثناء حفل مجمع مدارس زهران
تفاصيل إحالة مسؤولة بتعليم الإسكندرية للتحقيق
كتب /أحمد رمضان
شهدت احتفالية نظمها مجمع مدارس زهران في محافظة الإسكندرية،واقعة مهينة لموجهة التربية الموسيقية بالمحافظة
وجاءت القصة كاملة كما ذكرها الصحفي احمد حافظ كالتالي
الحفلة باظت وانتهت نهاية مؤسفة.. والسبب: وكيل وزارة التعليم.
= اللي حصل بالظبط، إن وكيل الوزارة كان حاضر، والأستاذة الفاضلة موجه أول التربية الموسيقية في مديرية التعليم بالإسكندرية هي اللي كانت مسئولة عن الحفلة، ومسئولة عن تقديم الفقرات وإحضار الطلاب المشاركين من كل الإدارات التعليمية.
= وكيل الوزارة شاف إن العدد اللي طلع على المسرح من الطلاب المشاركين كبير.. واعتبر إن ده ضد مباديء المسرح، وإنه ده تهريج، وإن الأستاذة (لوسي) موجه أول التربية الموسيقية (مسئولة فاشلة) ومتنفعش تقعد في منصبها دقيقة واحدة ولازم تمشي.. عارفين كل ده حصل فين؟ واتقال فين؟. حصل واتقال في الميكروفون قدام الناس كلها.. طب مين قال كدة؟.. السيد وكيل الوزارة.
= الوكيل طلع على المسرح ومسك الميكروفون.. طبعا السيدة الفاضلة اللي بتنظم الحفلة منتظره منه كلمة شكر مثلا.. كتر خيركم يا جماعة.. لأ ده محصلش.. طلع مسك الميكروفون والناس كلها سكووووت علشان وكيل الوزارة هيتكلم.. وصدم كل الحضور لما قال وهو بيوجه كلامه لموجهة التربية الموسيقية في مديرية التربية والتعليم: (انتي لا تعرفي عن تقاليد المسرح ولا تنفعي تستمري في منصبك وأنا حولتك للتحقيق).
= لأ مش بس كدة.. ده كمل في الميكروفون قدام الطلبة والمعلمين والضيوف المشاركين ووجه كلامه لمدير الأنشطة (وانت كمان لازم تمشي وهرجعك المكان اللي انت جيت منه، واعتبر نفسك متحول للتحقيق).. وللأسف السيدة الفاضلة انهارت من البكاء لما تسمع كدة في احتفالية عامة حاضرها قيادات ومعلمين وطلاب ومشرفين وضيوف من كل مكان.. وباظت الحفلة.
= سيادة الوزير: ده مدير مديرية تعليمية حضرتك اللي اخترته للمنصب ده.. تفتكر ده أسلوب ودي طريقة محترمة من أعلى مسئول تربوي في المحافظة؟.. هل في قانون أو حتى عُرف بيقول إنك علشان مسئول كبير تمسح بكرامة الناس الأرض في احتفالية عامة وفي مكبرات الصوت؟. سيادة الوزير لو الموقف ده مستفزش حضرتك ويخليك تتدخل شخصيا لرد اعتبار السيدة الفاضلة دي مهما كان السبب اللي خلى الباشا وكيل الوزارة يعمل كدة بالطريقة غير الإنسانية والتربوية والأخلاقية دي، يبقى حضرتك متلومش على الطلبة لما يمارسوا التنمر والانتهازية والتسلط والاستعلاء وأحيانا البلطجة.
= بالمناسبة يا سيادة الوزير: النهاردة السيد رئيس الجمهورية كان في احتفالية عن دور المرأة ومكانة المرأة وآداب التعامل مع المرأة، وهي في البيت وفي الشغل وفي الشارع ولازم تتعامل باحترام.. واللي اتهانت برضو النهاردة في مكبرات الصوت كانت امرأة ومعلمة فاضلة حاولت تعمل حاجة كويسة ومش عايزة غير كلمة شكرا.
= هل سمعت كلام الرئيس.. يا سيادة الوزير؟!
