أميرة مدبولى: التيجانى قالى أنتي عند ربنا أحسن من الكعبة وأتمنى أقبل فيكى الحجر الأسود
كتبت/سعاد حسن
حرصت إحدى السيدات وتدعى أميرة مدبولى على دعم خديجة خالد الفتاة التي كشفت عن واقعة تحرش حدثت من الشيخ صلاح الدين التيجاني ضدها
وأكدت أنها تدعم خديجة خالد في كل كلمة قالتها وطلبت من والدة خديجة الوقوف بجانب ابنتها ومساندتها لإثبات حقها
كما كشفت أميرة مدبولى عن موقف جمعها الشيخ التيجانى وكتبت عبر صفحتها الشخصية بموقع التواصل الاجتماعي فيس بوك
حبيبتي خديجة خالد
عارفة انك مش بنتي بس زي بنتي وممكن في وضعك انت اكتر
المرض النفسي مش عيب …ولا يقلل من حقك في شهادة.
وغير مسموح بأي شكل ربطه بشهادتك كنوع من التمرير
بالعكس ضحايا التحرش عُرضة للاضطرابات بسبب اللي بيحصلهم
أم خديجة اتمنى تحضني خديجة حضن تطمنيها
واسأل الله الهداية ليكي وإنك تحني عليها وتدعميها
اوعي تنتصري لنفسك
او حتى تنتصري للحق فقط
على حساب نفسية بنتك
دي شهادة مني قدام ربنا
عبد الرحيم كمال هو مريد الشيخ صلاح
كان صدر منه موقف مسيء جدا لي وقتها
كان عاوز يشغلني في ورشة ونوس
ورحت للشيخ صلاح عشان هو كبيره
فقالي الآتي تحبي يصلح غلطته ازاي!
قلتله ياشيخ مفيش غلط حصل ولكن هو طلب مني اتجوزه وشهود بالتلفون ودا بالنسبالي مهين لي ولأهلي
يعني ايه يتجوزني بالتلفون
وكلم ساعتها عبد الرحيم اكبر اتنين بيكتبوا في مصر مش حقول اسمهم
يثبتلي حسن نيته(بالجواز عن طريق التلفون بشهادة الاتنين )
المهم الشيخ صلاح كانت علاقتي طيبة معاه وامتدت سنين
ولكن في مرة بعتلي كالآتي
أنا حلمت بيكي انت وخديجة(بنتي) في الكعبة
قلت له أنا نفسي اروح الكعبة
قالي انت عند ربنا أحسن من الكعبة
أنا نفسي أطوف حواليكي…. واقبل فيكي الحجر الأسود
أنا مش بحب أحط سكرين شوتس وبعتبر الكلام دا شهادة في حق البنوتة خديجة
أنا عمري ما اتكلمت عن موضوع عبد الرحيم لأني خدت حقي منه وقتها باني (شتمته)
انا عمري مابطلت اتكلم مع الشيخ بعدها
عشان اكون صادقة لان وقتها الناس قالولي عادي الكلام وان فهمي هو اللي مش تمام
إلا ناس قليلة
اتمنى ياخديجة ان شهادتي توصلك
وان رمي حد بستيجما انه مريض نفسيا
فبدل ما نرحمه نقول عليه متوهم
أنا ياخديجة عملت دا عشانك انت بس
ودا طلب شخصي مني لكل الناس محدش يعمل شير محدش يبعت يسألني
محدش يستخدم كلامي لبص شوف
وانا مش سامحة لاي حد يتكلم في الموضوع دا
ولا أنا شخصيا
الشيخ صلاح مش كل كلامه مناسب ومن حق اي بنت وست تنزعج تقول
واسفة لنفسي اني جبنت ياخديجة مش شجاعة زيك
وفضلت بعد المسدج دي أتواصل للأسف معاه والنهاردة بس اللي صدقت نفسي
ودا طبعا مفهوم نفسيا بالنسبالي
بس مش كلنا بنقدر نتكلم ياخديجة
مش كلنا
